Филмот „Домаќинство за почетници“ во режија и по сценарио на Горан Столевски ја доби 17. Queer Lion награда на 80. издание на филмскиот фестивал во Венеција. Во конкуренција беа 16 филма меѓу кои и Dog Man на Лик Бесон и Maestro на Бредли Купер. Филмот е во продукција на „Лист продукција“ од Скопје. Во образложението за наградата пишува:
„Го наградуваме филмот на Горан Столевски за невообичаеното и храбро прикажување на етникумите, различностите, родовиот идентитет, љубовта, пријателството и емотивните афинитети.“
„Домаќинство за почетници“ завчера имаше светска премиера во Венеција, во рамките на натпреварувачката програма „Хоризонти“, а публиката во преполната сала „Дарсена“ со голем аплауз и долги стоечки овации ги награди режисерот Столевски и актерската екипа во филмот.
– Квир семејствата не се иднината, тие се сегашноста – изјави Столевски по долгиот аплауз по проекцијата на неговиот филм.
„Домаќинство за почетници“ доби е специјално признание од италијанската фондација Fondazione Fai Persona Lavoro Ambiente за социјално ангажиран филм.
„Филмот е навистина извонреден бидејќи го истражува влијанието на различните слоеви на идентитет, како што се полот, етничката припадност, сексуалната ориентација и религијата преку интерсекциска призма“, пишува во образложението.
